في الذكرى الحادية عشرة لرابعة العزة والكرامة، قدم الشاعر طه رضوان في ذكرى مذبحة رابعة أوبريت #كنت_هناك وهي أبيات زجلية لأدوار شباب وأطفال ومصريون كانوا في رابعة..
البداية:
في قلب العاصمة الأولى يتحدث أعـظـم ميدان
عن أطهر فرسان ماتوا كي يحيا خير الأوطان
قد رفعوا الراية باليمنى كي يُعلوا شـأن الإيمان
والعهـــد على نصرة دين و الوعــد بآي القرآن
عاشوا بالخير وبالتقوى و لهم تكريم المــيدان
ميدان العزة ناداني
ارجع و بصحبك إخواني
ارجع قد تاقت أرضي لكم
و اشتقت لعطر القرآن
#شاب كان في رابعة:
ومين غير رابعة يحضني
بكل حنان
دي فيها عزوتي وناسي
وأهل الجنة والقرآن
وفيها الأرض بتسبّح
بحمد الواحد المنان
وفيها النور بيتوضا
في كل أدان
هنا حركة
هنا بركة
هنا قعدة مع الصبيان
شوارع رابعة عارفاني
وفاكراني وحاضناني
وعايش فيها
أفراحي وأحزاني
مهيش زي البشر يامة
ولا بتكدب ولا بتقسى
ولا للخير كده بتنسى
ولو تاهت بنا المرسى
فرابعة كل شطآني
دي هية النور
بصوت الحق بتكبر
وعارفة قيمة الأحرار
وعاشقاهم وبتقدر
لا عمرها يوم قالت لأة
ولا مالت بتتكبر
هتفضل رابعة تندهلي
أقوم تاني
بصوت الحق تهتف لي
أعود تاني
وتفضل رابعة آهاتي
وتاريخي وأشجاني
ومهما نقول ونتذكر
هتفضل رابعة عنواني
#طفل كان في رابعة:
وأنا فاكر كمان رابعة
وفاكر كل أحبابي
وأصحابي وألعابي
و حضني لكل أحبابي
هنا مصحف وكراستي
وكرتي جنب مرجيحتي
وألواني وبالونتي
وسيارتي وطيارتي
وياما حفظت في كتابي
لعبت هناك أنا وأختي
فاكر أحمد كمان ماجد
شوارع رابعة عشقوني
وياما دعيت وانا ساجد
وصورة مرسي في عيوني
وصلينا هناك تراويح
وكان صوتنا يهز الأرض
ويزلزل في أرواحنا
وياما تعبنا وارتحنا
ويامادارينا ف جروحنا
وفرحت فيها أرواحنا
وشفت الجنة بعيوني
يا ريتنا نعيش زمان رابعة
واصلي كمان صلاة رابعة
واشوف اصحابي في رابعة
يا أهل الحق ساعدوني
ويبقى قلبنا واحد
وصوتنا كمان يكون واحد
وعزة ربنا الواحد
شوارع رابعة وحشوني
#بائع في رابعة :
ومين ينساك يا رابعة؟
وأنا هحلف يمين الله
بأن اللي في رابعة عجيب
ولو احكيلكوا عن رابعة
أكيد هتقولوا عني غريب
في رابعة كل خير وأمان
وفيها الرحمة بالإنسان
وفيها تلاوة القرآن
شبابهم كانوا زي الورد
قلوبهم كلها إيمان
وإيد ممدودة بالإحسان
وكنت أمشي
وأسيب الفرش
والميزان
واروح على بيتي وولادي
منيش قلقان
ولما ارجع
الاقي الدرج وفلوسي
بكل أمان
تشوف النور
على وشوشهم
بكل أدان
وضحكة م القلوب صافية
دعاة إيمان
وأطفال نسمة بتعطر
في كل مكان
وأخلاقهم كده عظيمة
ولا فيه يوم
سمعت خناق
ولا إهانة ولا شتيمة
ببسمتهم
وبساطتهم
كده يعاملوك
فبيخلوا لك القيمة
كان فيهم الدكتور
والشيخ أبو عمامة
والشاب والمشهور
والأخت سلّامة
بتعدي بحجابها
بأخلاقها وأدبها
مستورة بكرامة
يا ريتها كانت تدوم
وتدوم لياليها
يا حي يا قيوم
ارحم أهاليها
بكرة القيامة تقوم
واحكي اللي صار ليها
يا خلق قوموا اهتفوا
دي الجنة كات فيها
الجنة كات فيها
#طبيبة في المستشفى الميداني :
آااااه يا رابعة
ومليون آه ما تكفيني
دا يوم الفض
يوم مشهود
وآهاته
بتقتلني وتحييني
في يوم الاربع
وبعد الفجر والأذكار
عرفنا بنية الخوان
عميل وجبان
بكل خيانة وبخسة
بدا العدوان
وصوت الضرب بيسمع
ونار ودخان
لوادر والكلاب فوقها
كما التعبان
حصار يخنق
رصاص مرشوش
في كل مكان
وداعم نفسه بالطيران
وجند الحق بيدافعوا
في كل مكان
هتافهم كله كان بيقول
يا رب العزة يا رحمن
هنا رشاش هنا رصاصة
وفوق طيران وقناصة
جثث كانت في كل مكان
عليها علامة الإيمان
هناك صرخة ومكتومة
وهنا صرخة بلحن أدان
ودم شهيد هناك نازف
هتافه مزلزل الميدان
وريحة مسك كات فايحة
وناس شهدا وناس جرحى
وناس ضحكتها م الفرحة
بشوفة سيدي العدنان
وكان الكل بيكبر
وكله لكله بيصبّر
هنا هالة وأمل وحنان
هاتوا لنا الشاش
وهاتوا قماش
وهاتوا الدم ياخوانا
عشان عايزينه في الإنعاش
وناس بتشيل
ودم يسيل
وحمل تقيل
عشان حرية الإنسان
وكان الكل متحمل
وحالف انه هيكمل
بندعي ربنا يقبل
يبيد الظلمة والأوباش
وفاكرة كمان
لما جه لنا ضابط
وقال لي هنحرق الميدان
فقوموا وانزلوا يللا
معادش أوان
ويومها رفضت
قلتلهم
معايا جريحين
ومقدرشي اروح واهرب
واسيبهم فين
في غمضة عين
وبرصاصة
قتل الاتنين
وقال غاروا خلاص يللا
وسب الدين
ومش هنساك يا رابعة
ولو مليون سنة هتروح
خلاص عايشة
في تكويني وجوة الروح
حياتي وروحي تفديك
ولو كان عندي
مليون روح
ومش هنساك يا رابعة
#امرأة كانت في رابعة :
يا رابعة والله فاكرينك
وحبك كل يوم بيزيد
وفاكرين كل حكاويك
وفاكرين فيك يوم العيد
وأفراحنا وأتراحنا
وطرح الخير في مطرحنا
دموع القلب والزغاريد
ومقدرشي أروح وأنسى
طب أنسى ازاي
يا أحلى نشيد
بكل ارواحنا نفديك
هتافنا الحر عهد شهيد
نصون العهد في قلوبنا
ويطلع منا فجر جديد
صيامنا ف حر أيامك
هتاف يضوي في لياليك
صلاتنا جوة في خيامك
وتسبيح كل خطاويك
قوليلي أقدر أعيش ازاي
وروحي الطاهرة كات فيك
#شيخ كان في رابعة:
فاكر رابعة في كل نهار
وسامع نغمة الأذكار
و صبر صيامنا وقيامنا
وصحبة خير وناس أطهار
فاكر صوتنا ف سكون ليلك
سامع نبضك وترتيلك
وياما قعدت أشكيلك
وكنت تصبري الأحرار
يا رابعة عايشة جوانا
يا نبض الروح يا ساكنانا
ما دام رب الورى معانا
هنسحق كل ليل غدار
يمين الله ما هنساك
ونور رابعة في قلبي دليل
ما يسكن قلبي إلاك
وجاي من بعدي
جيل ورا جيل
وحقك شعلة مرفوعة
في ساح الحق للأبرار
#ساكن في رابعة :
ومين ينساك يا رابعة ؟
يا ساكنة القلب والنني
وجوة العين
ساكن رابعة
بقالي سنين
لا ليا ف دين
ولا سياسة
لا عمري قلت
دول ملاعين
ولو كان ضحك ووناسة
ومن شغلي على بيتي
ومن بيتي على شغلي
ومالو
كرامتي منداسة؟
ما كل الناس
كده عايشة
وغيرنا قصور وبحراسة
شهادة حق
هحكيها لوجه الله
هموت خوفي وارويها
ومن غير آه
صلاة رابعة
كانت رحمة
وكانت نور
كمان لينا
وصوت
بكرامة بينادي
وبيصحي اللي مات فينا
شباب فاهم وبيوعي
عشان
يحمي اللي بعدينا
شبابهم كانوا زي الورد
نظام ونضافة
مش على حد
وأخلاق عالية وبراءة
تعامل كان يفوق الحد
لا يوم اتهجموا علينا
ولا كانوا في يوم حاقدين
ولا سرقوا حاجات لينا
ولاد عفة ومش حاسدين
ويوم ما هربنا ومشينا
فكانوا للشقق حاميين
لا كسروا باب
ولا خشوا
ولا كدبوا ولا غشوا
ودايما كانوا
ناس صادقين
وهفضل عمري
أدعيلهم
ودايما هحكي
عمايلهم
هحاول أسد
جمايلهم
وهدعي بقوة
ع الظالمين
أنا شاهد
أنا وزوجتي
وأولادي
كمان أختي
ومش عايز
أموت إلا بشهادة حق
يوم الدين
النهاية بالتوزيع على المجموعة :
مش كفاية
مهما قلنا
ومهما عدنا
مش كفاية
رابعة مش فصل
ف رواية
رابعة مش فقرة
ف مظاهرة
رابعة
ميت مليون حكاية
رابعة
عزة وعايشة فينا
رابعة نور
في السكة لينا
والكرامة والعدالة
و انتصار الحق فينا
رابعة
كات أعظم مدينة
مهما مر ومهما عدى
مستحيل هنقول نسينا
رابعة مش كلمة
في عبارة
رابعة مش حتة إشارة
رابعة كات أعظم تجارة
فيها ربح مفيش خسارة
رابعة معنى للطهارة
رابعة شمس وعرفتنا
مين ذليل وسط الحقارة
عرفتنا مين شيوخنا
ومين اللي عايشين
ع القذارة
رابعة دي شمس الصباح
رابعة نجم الحق لاح
رابعة مش أيام وعدت
رابعة حي على الكفاح
رابعة كات أمن وأمان
رابعة كات صوت الأدان
كنا عايشين جوة منها
واحنا فرسان الميدان
مهما قلنا ومهما عدنا
برضو لسة مش كفاية
رابعة رمز الحق باقي
له بداية ملوش نهاية
https://web.facebook.com/photo/?fbid=800519585614373&set=a.102581838741488&locale=ar_AR
